文件披露　巴塞高層鬧美斯係老鼠、侏儒

最強博彩盤路過關神器《串績王》：http://win.on.cc/football/　

巴塞隆拿前會長巴度美奧年代，曾鬧出網絡水軍醜聞，會方外聘網絡大軍抹黑自己多位主力，達到降薪目的，加泰警方調查文件近日曝光，當年有巴塞主管鬧美斯係坑渠老鼠同賀爾蒙侏儒，非常粗鄙。

有分參與事件嘅巴塞高層，包括法務主管龐蒂、CEO勞格，當然仲有「大雄」巴度美奧，佢哋故意洩漏美斯、碧基等主力合約內容，令外間輿論針對球員，從而達到降薪目的，手法相當卑劣。

警方一分文件顯示，大約3年前龐蒂與巴度美奧一次電郵對話中表示：「你唔可以對呢隻坑渠老鼠咁好，球會咩都畀晒佢，但佢好自私，操縱球會自肥，球會畀呢個賀爾蒙侏儒勒索。」

文件被西班牙傳媒曝光，美斯喊住離隊一幕歷歷在目，一班巴塞前高層再度成為球迷炮轟對象，美斯依家仲未同巴黎聖日耳門續約，但爆出呢件事，佢重返巴塞機會相當渺茫。