雲迪碧克做完手術　提早收咧

最強博彩盤路過關神器《串績王》：http://win.on.cc/football/　

曼聯「地獄黑仔王」雲迪碧克喺月初英超對般尼茅夫，被對手馬高斯辛尼斯飛剷，導致膝部嚴重受傷，最終需要做手術，並正式宣布，無緣今季餘下賽事。

雲迪碧克做完手術之後，影相放上社交網「報平安」，佢話：「感到非常失望，我今季已經結束，手術總算成功，準備開始進行康復工作，多謝各位傳來充滿愛嘅訊息同支持，對於我同家人意義重大。」

曼聯領隊坦哈格對於呢位25歲荷蘭同胞將來康復充滿信心：「呢次粗野攔截令雲迪碧克遭受恐怖傷患，幸好長遠而言，佢可以完全復元，雖然今季唔可以再上陣，但下季季前集訓，應該可以復出。」

雲迪碧克2020年夏天由阿積士加盟曼聯後，一直被投閒置散，更曾被外借去愛華頓。佢今季各項賽事上陣10次，並冇取得入球，曾經傳出曼聯可能放棄呢位中場，加上今次受重傷，令佢嘅紅魔鬼生涯愈來愈暗淡。