4個月痛失3好友　干地再暗示離開熱刺

最強博彩盤路過關神器《串績王》：http://win.on.cc/football/　

熱刺領隊干地同球會合約到季尾完結，續約一事遲遲未有着落，有傳聞呢位意大利教頭將會離隊。干地近日表示，過去4個月經歷3位好友先後離世，令佢明白家人同朋友嘅重要性，心痛經歷會影響佢對前途嘅考慮，似暗示會重返意甲。

熱刺體能教練兼干地多年戰友雲杜尼，上年10月因急性血癌去世；意甲名將米赫洛域亦喺12月因病與世長辭；同干地喺祖雲達斯同意大利國家隊合作嘅維埃里，今個月亦魂歸天國，短時間內失去3位好友，干地表示：「今季對我個人嚟講係困難嘅一季，短時間失去3位好友，令我重新思考未來。當我哋寄情足球，有時會忘記家人同朋友，為足球我哋放棄咗好多，但呢啲事情令我反醒，生活唔係只係得足球，係咪要放多啲時間去陪家人同朋友。」

雖然干地喺倫敦工作，但為咗遷就佢嘅15歲女喺意大利讀書，老婆同家人都仍然喺意大利生活，干地要喺賽程空檔先可以飛返意大利陪屋企人，如果佢約滿後決定唔續約熱刺返去意大利，相信球迷亦會體諒。