丹尼爾涉嫌性侵　被送往監獄扣押

最強博彩盤路過關神器《串績王》：http://win.on.cc/football/　

有份為巴西出戰今屆世界盃嘅老將丹尼爾涉嫌喺西班牙巴塞隆拿夜店性侵1名女子，被當地警方拘捕，並暫時送往監獄扣押調查。丹尼爾效力嘅墨西哥球隊普馬斯宣布，同呢位39歲右後衞解除合約。

據悉受害人向警方舉報，指丹尼爾上月30號喺夜店內伸手入佢內衣褲，作出非禮行為，當時呢位女子曾經向保安投訴，1月2日正式報案，警方喺周五(20日)拘捕丹尼爾，法院已下令唔准保釋。

丹尼爾已否認指控，稱聲當時同好多人喺夜店內跳舞狂歡，並冇性侵任何人。雖然法庭仲未判丹尼爾有罪，但其所屬球會普馬斯已率先「斬纜」同佢劃清界線，發表聲明指球會唔容忍任何違反球隊精神嘅行為，所以決定同丹尼爾解約。

丹尼爾曾經效力巴塞隆拿、祖雲達斯、巴黎聖日耳門等球會，並為巴西國家隊上陣126次入8球。今屆世界盃分組賽巴西對喀麥隆，丹尼爾擔任正選，以39歲零210日成為「森巴兵團」史上喺世界盃最大年齡上陣球員。