35分鐘證明1億身價 梅迪歷係新洛賓?

2023年01月22日 09:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
車路士周六(21日)英超作客0比0打和利物浦,近5場聯賽第4度失分,不過「藍戰士」球迷就非常滿意,事關身價1億歐元嘅新兵梅迪歷粉墨登場,只係踢35分鐘已經光芒四射,令質疑佢轉會費嘅人都話「物有所值」,多位英超名宿對佢讚不絕口,謝拉特更形容佢係「新洛賓」!
22歲嘅梅迪歷上星期由薩克達加盟,今場喺55分鐘上陣威脅力大,包括2次成功扭波、3次成功攔截、92.9%傳球成功率等突出數據,盡展速度同技術,車路士領隊樸達賽後表示:「梅迪歷喺單對單非常危險,可以喺前場創造機會,係嗰種令球迷睇到企起身嘅球員,我哋會幫助佢盡快適應英超。」
一眾英超名宿睇完呢位烏克蘭新星首演後,紛紛對佢投以信心一票,前車路士中場祖高爾話:「佢搞到利物浦風聲鶴唳,又扭得又射得,呢35分鐘令我好興奮。」曼聯名將加利尼維利表示:「睇咗佢10分鐘,我知我唔會想喺球場對住佢。」
利物浦傳奇謝拉特更將梅迪歷同荷蘭翼鋒洛賓相比:「如果我係車迷一定好開心,佢真係有料,令我覺得好似洛賓,睇梅迪歷控制個波同速度,車路士球迷會好興奮。」
車路士日前再官宣用3,500萬歐元簽入燕豪芬翼鋒馬杜基後,鋒線人腳非常鼎盛,梅迪歷、馬杜基、夏維斯、美臣蒙特、祖奧菲歷斯、奧巴美揚、薛耶治、基斯甸普列錫、大衞科芬拿等粒粒皆星,有望重振雄風。