C朗聯賽地標反高潮　食白果兼去錯場區

足球博彩神器，每日重心提供盡在《彩報》：http://win.on.cc/football/　

C朗拿度今個月以天價簽約中東豪門艾納斯，周一(23日)凌晨上演沙特阿拉伯聯賽「地標戰」，雖然上場表演賽踢得唔錯，不過今仗主場對伊蒂法克表現麻麻，全場4次射門只得1次中龍，就連賽前熱身都走錯去對面場區，要隊友叫番佢返嚟，明顯仍未適應新環境。

艾納斯上場同巴黎聖日耳門踢表演賽，C朗有2個入波，今場正式比賽首演備受注目，大批球迷拎晒橫額入場打氣，不過呢位37歲老將狀態一般，頭2腳掂波都造成甩波，無論係招牌罰球定係扣大位射門都未能命中，下半場一次禁區內扭波窄位射門，係佢唯一命中目標攻門，不過艾納斯最終仍憑巴西前鋒塔利斯卡入波贏1比0，以1分領先踢多1場嘅艾希拉排榜首。

艾納斯教練魯迪加西亞賽後表示：「C朗係足球史上最佳球員之一，我哋要盡可能為佢製造最理想嘅環境，希望佢可以享受足球，C朗好開心今場第1次同呢班隊友合作。」