皇馬巴塞齊奏凱　賓施馬平魯爾紀錄

足球博彩神器，每日重心提供盡在《彩報》：http://win.on.cc/football/　

周一(23日)西甲賽事，榜首雙雄巴塞隆拿同皇家馬德里齊齊贏波，巴塞繼續以3分壓倒皇馬排榜首。皇馬前鋒賓施馬今輪又有入球，令佢追平傳奇前鋒魯爾嘅西甲入球紀錄，成為皇馬史上第2多聯賽入波球員。

皇馬今輪作客畢爾包未見優勢，但勝在前鋒把握力強，24分鐘馬高阿辛斯奧攻門「撻頭」，賓施馬把握機會窩利抽入死角，皇馬之後同畢爾包拉鋸，要到補時階段先由卻奧斯入波鎖定2比0勝局。賓施馬今場入波，係佢歷來第228個西甲入球，追平魯爾成為皇馬史上聯賽入波第2多球員，僅次於「士哥王」C朗拿度嘅311球。

至於「1哥」巴塞隆拿亦順利奏凱，佢哋憑新星柏迪上半場一箭定江山，主場1比0擊敗基達菲，不過教練沙維賽後表示：「呢場勝利好重要，不過老實講球隊表現麻麻，西超盃後球員出現心理疲勞，我哋需要作出改善。」