皇馬玩嘢　僅分配334張門票畀馬體會

最強博彩盤路過關神器《串績王》：http://win.on.cc/football/　

周五(27日)凌晨將上演西班牙盃8強「馬德里打吡」，皇家馬德里主場對馬德里體育會，根據西班牙《馬卡報》爆料，皇馬恃主隊身份，僅分配334張門票畀馬體會球迷，藉以抑制對手聲勢。

據悉有4,022位馬體會球迷透過球會，申請購買門票，但皇馬只提供334張。馬體會曾經要求「銀河艦隊」提供更多波飛，但遭到拒絕。

《馬卡報》指雖然歐洲賽有規定，主隊必須提供一定比例門票數量畀客隊球迷，但西班牙本土賽事並冇呢種規定，所以皇馬今仗西班牙盃可以自行決定畀對手球迷幾多門票，梗係盡量縮水，令球隊可以發揮最大主場之利。