曼聯入啱貨!韋格賀斯開齋 唔止入波咁簡單

2023年01月26日 09:00
東網電視
更多新聞短片
足球博彩神器,每日重心提供盡在《彩報》:http://win.on.cc/football/ 
曼聯同C朗拿度解約後,1月轉會窗借用荷蘭前鋒韋格賀斯頂替,周四(26日)凌晨英聯盃對森林終於攻入轉會後第1個入球,雖然「產量」唔高,不過呢位荷蘭國腳嘅貢獻依然獲得各界讚揚,就連出名評論苛刻嘅堅尼都話曼聯入啱貨!
曼聯借用韋格賀斯後,第3次上陣終於入波,曼聯領隊坦哈格表示:「呢個入波對佢嘅信心好重要,佢喺之前2場嘅逼搶、走位、柱躉工作都做得好好,般奴費南迪斯對水晶宮入到波,因為韋格賀斯作出適當走位;拉舒福特對阿仙奴入波,因為韋格賀斯引開對方中堅;不過作為前鋒,入波先會令佢哋開心。」
曼聯名宿堅尼對韋格賀斯同樣欣賞:「曼聯冇咗C朗後需要一個前鋒,而球會已經講明冇錢,所以我明白點解會簽韋格賀斯,佢唔係頂級射手,但佢嘅串連唔錯、把握力好,坦哈格又對佢非常熟悉,如果可以間唔中有呢啲重要入球就更好,佢係荷蘭國腳,唔係二打六!」