沙維生日收大禮　巴塞殺入西盃4強

最強博彩盤路過關神器《串績王》：http://win.on.cc/football/　

周四(26日)凌晨西盃8強大戰，巴塞隆拿憑奧士文尼迪比利一箭定江山，主場1比0擊敗皇家蘇斯達，為43歲生日嘅教練沙維送上最佳禮物。

巴塞隆拿今場控球率高達74%，法國右翼奧士文尼迪比利更係攻勢泉源，佢今場11次嘗試扭波。全場唯一入球出現喺52分鐘，奧士文尼迪比利右路高部突破，窄角度下狂抽，門將拍到都照樣入網，最終巴塞贏1比0晉級。

43歲生日嘅教練沙維，賽後對奧士文尼迪比利有高度評價：「佢成熟咗好多，我睇到佢有非常豐厚嘅潛質，所有閘位球員見到佢都冇晒符，奧士文尼迪比利係可以用一己之力扭轉比賽嘅球員，我戥佢開心。」

另一場西盃8強賽事，奧沙辛拿主場2比1擊敗西維爾，自2005年後再入西盃4強。