【官宣】熱刺新兵登場　球迷洗版轟兩頭蛇

足球博彩神器，每日重心提供盡在《彩報》：http://win.on.cc/football/　

英超勁旅熱刺周三(25日)官方宣布，球會成功借用維拉利爾前鋒哥爾尼維特至季尾，而且借用完結後有權用3,000萬歐元轉會費+獎金將佢買斷。不過呢位25歲前鋒喺最後關頭「反口」拒絕加盟愛華頓，就被球迷炮轟係「兩頭蛇」。

荷蘭前鋒哥爾尼維特原本已經同愛華頓傾掂晒，完成體測兼做埋轉會訪問，佢喺訪問入面豪言：「已經準備好」、「會盡一切能力為愛華頓護級」，點知簽約前熱刺突然提出斟介，24小時後哥爾尼維特就拎住熱刺波衫亮相，著名記者Fabrizio Romano透露：「愛華頓覺得非常震驚同憤怒。」

哥爾尼維特喺twitter宣布加盟熱刺後，大批愛華頓球迷去洗版炮轟：「你慶祝入波動作係扮蛇，原來你真係兩頭蛇......」哥爾尼維特轉會後就表示：「當我知道熱刺斟介，呢個決定就唔需要考慮，熱刺有神奇嘅領隊、職員同設備，我好興奮可以成為熱刺一份子。」