列斯聯「美化」　前曼聯助教同麥堅尼來投

足球博彩神器，每日重心提供盡在《彩報》：http://win.on.cc/football/　

英超球會列斯聯喺美國領隊馬殊帶領下，表現一直獲得好評，2位美國國腳泰拿阿當斯、班頓艾朗臣都被視為「平靚正」收購，據報列斯聯打算進一步「美化」，球會已接近簽入祖雲達斯嘅美國中場韋斯頓麥堅尼，而前曼聯助教岩馬斯亦正式加盟。

列斯聯官方宣布，50歲美國教練岩馬斯正式加盟，將會出任馬殊助手，佢上季曾經擔任蘭歷克嘅曼聯助教，同馬殊都屬於「紅牛系」教頭，同樣師承蘭歷克，相信佢哋合作同理念上都唔會有問題。

另外，意大利《天空體育》報道，列斯聯開價2,200萬鎊收購祖雲達斯中場韋斯頓麥堅尼獲接納，呢位美國國腳亦同列斯聯傾好個人條款，轉會有望今個星期內落實。