喬治娜Netflix紀錄片第2季　C朗迷等食花生

最強博彩盤路過關神器《串績王》：http://win.on.cc/football/　

C朗拿度女友喬治娜上年推出Netflix紀錄片《我是喬治娜》，講佢點樣由「山雞變鳳凰」，同C朗嘅愛情故事大受歡迎。喬治娜日前喺社交網宣布，《我是喬治娜》第2季將會喺今年3月推出，預料會有佢哋離開英超轉戰沙特阿拉伯嘅內幕，球迷當然等食花生。

喬治娜喺IG貼出《我是喬治娜》第2季嘅宣傳相，着黑色吊帶小背心嘅佢以球證造型出現，左手拎住個閃令令嘅銀雞、右手舉起一張貌似紅牌嘅信用卡，完全表現出喬治娜同足球生活、富豪生活嘅關係，唔少粉絲都話非常期待。

暫時未知《我是喬治娜》第2季嘅內容係乜，不過普遍預期會有C朗同曼聯反面嘅背後故事，佢哋選擇離開英超去沙特阿拉伯嘅心路歷程等等。喬治娜之前已經常喺社交網為C朗反擊外界指控，相信紀錄片會有更激嘅內幕。