恩斯倒戈曼聯　望坦哈格手下留情收起福仔

最強博彩盤路過關神器《串績王》：http://win.on.cc/football/　

曼聯將於周日(29日)凌晨英足盃第4圈主場對英冠球隊雷丁，奧脫福球場將迎來一張熟悉舊面孔，就係昔日紅魔鬼中場恩斯，呢位英格蘭名宿現時擔任雷丁領隊，佢承認最驚曼聯前鋒拉舒福特，希望紅魔鬼主帥坦哈格手下留情，收起呢位大勇射手。

拉舒福特近10次為曼聯上陣入10球，包括上仗英聯盃對諾定咸森林，個人表演射入世界波，恩斯都嘆為觀止：「拉舒福特以往表現曾經備受批評，但現時已經判若兩人，即使英超後衞都唔知點樣防守佢，我哋好難應付佢，希望佢今場唔好上陣啦。」

由於曼聯近期賽程頻密，坦哈格今仗可能作出多個輪換，包括用加拿祖代替拉舒福特踢正選，恩斯的確有機會「願望成真」。

恩斯球員時代曾於1989至95年效力曼聯，協助球隊捧過2次英超冠軍等錦標，屬於紅魔王朝第一代骨幹人物，其後轉投國際米蘭，但佢1997年加盟曼聯死敵利物浦，成為紅魔球迷嘅眼中釘，恩斯表示今次重返奧脫福球場，並唔擔心被球迷針對。