好波有好報　利物浦18歲小將獲續約

最強博彩盤路過關神器《串績王》：http://win.on.cc/football/　

利物浦正式宣布，同18歲中場巴斯迪續約至2027年，主帥高普大讚呢位新星進步非常大好，並且仲有提升空間，睇好佢可以成為球隊未來主力。

利物浦2020年向西甲球隊切爾達簽入巴斯迪，當時轉會費僅20萬鎊，呢位西班牙小國腳由紅軍U18及U21開始踢起，今季成為一隊成員，並於季初大勝般尼茅夫9比0一役首次上陣。

巴斯迪代表作一定係上年12月底英超對阿士東維拉，射入1球，協助利物浦作客贏3比1，至今各項賽事累積上陣10次入1球。

巴斯迪續約之後表示心情非常興奮：「好開心可以繼續效力利物浦，我同家人都對於續約感到非常自豪，亦係我近2年嘅夢想，希望可以踢更多比賽。」利物浦中場近年出現老化，巴斯迪應該可以趁機上位。