曼城淘汰阿仙奴代價大 防線大將受傷

2023年01月28日 08:00
東網電視
更多新聞短片
(Getty Images)
足球博彩神器,每日重心提供盡在《彩報》:http://win.on.cc/football/ 
周六(28日)凌晨英足盃第4圈焦點之戰,曼城憑後衞尼敦阿基下半場入波,主場以1比0擊敗阿仙奴,率先打入第5圈16強,同時一挫英超榜首兵工廠銳氣,為爭奪聯賽錦標壯聲威。不過,曼城贏波晉級亦付出沉重代價,中堅史東斯受傷,爭標之路有隱憂。
英超一、二哥今季首次交鋒,被譽為冠軍前哨戰,阿仙奴明顯重視聯賽多過英足盃,今仗正選陣容作出6個輪換,包括新加盟嘅翼鋒李安度杜沙特擔正,呢位比利時國腳踢法相當有威脅,史東斯上半場末段,為咗攔截佢,導致自己受傷退下火線。
至於曼城強陣出擊,但射手艾寧夏蘭特連番起腳,都無功而還,換邊之後主帥哥迪奧拿換入祖利安艾華利斯加強攻力,呢位阿根廷國腳果然有料到,64分鐘遠射中柱彈出,基亞利殊攞到波,傳畀尼敦阿基射入。
呢位荷蘭國腳繼上月英聯盃對利物浦,攻入致勝1球之後,今仗英足盃又為曼城一箭定江山,可以話係「盃賽殺手」。
曼城贏波之後,各項賽事取得3連勝,並連續6次擊敗阿仙奴,哥迪奧拿不愧為爆「廠」專家,至於阿仙奴自上年11月英聯盃出局之後,首次正式賽事輸波。