摩連奴對羅馬失望　渴望重返車路士

最強博彩盤路過關神器《串績王》：http://win.on.cc/football/　

摩連奴上季幫羅馬贏得歐協聯冠軍，已算好成功，由於羅馬未有積極增兵，喺意甲爭標希望不大，有消息指摩dad渴望重返英超執教，首選球會自然係車路士。

英國《每日郵報》報道，剛度過60歲生日嘅摩連奴，對於羅馬未有加大投資感到失望，因此萌生去意，打算完成今季工作後離隊，下一站佢希望重返英超。

摩連奴過去曾兩度執教車路士，3奪英超冠軍，佢希望第3次執教，其經理人表示，寸王對於車路士任何時段職位空缺都感興趣，而且其妻兒仍然喺倫敦生活，佢可以隨時返倫敦開工。

雖然車路士近日表示繼續支持樸達執教，不過摩連奴並非即時返車路士，而係等到球季結束後再商量，到時就有好大討論空間，事關樸達近期領軍成績甚差，壓力甚大，如果到季尾都冇改善，車路士換帥並唔出奇，到時寸王就有機會。