世盃襲擊官員案　烏拉圭4人罰停賽

足球博彩神器，每日重心提供盡在《彩報》：http://win.on.cc/football/　

國際足協周六(28日)就卡塔爾世盃H組烏拉圭對加納賽後，FIFA官員遇襲事件公布判決及處分，烏拉圭荷西基文尼斯、梅斯利拿各停賽4場，卡雲尼、高甸各停賽1場，烏拉圭下仗主場關閉部分看台兼罰款，可能國際足協都覺得自己理虧，今次罰得都算輕。

事件起因好簡單，當日烏拉圭贏加納2比0，但由於同時間舉行嘅南韓2比1擊敗葡萄牙，搞到烏拉圭出局，而比賽期間卡雲尼、達雲紐尼斯多次禁區內被侵犯都冇12碼，球證又唔睇VAR，咁樣搞法佛都有火，烏拉圭被淘汰後，班球員好激動同球證及官員理論，甚至出現衝突，有官員遇襲，亦有球證被「問候」。

事發後有評論指，烏拉圭球員最重將面臨停賽15場，不過依家睇番判罰就濕濕碎，最重停4場，輕嘅停1場，然後烏拉圭被罰款5萬瑞士法郎，下場主場只係關閉部分看台，而唔係閉門作賽，等如話畀佢聽：今次就咁算，下次唔好喇。