「效率王」柏迪100戰　再做巴塞救世主

足球博彩神器，每日重心提供盡在《彩報》：http://win.on.cc/football/　

周六(28日)西甲賽事，巴塞隆拿作客1比0擊敗基羅納，繼續穩坐聯賽「1哥」位置，今場巴塞贏波英雄又係20歲新星柏迪，佢連續第2輪一箭定江山幫球隊拎晒3分，教練沙維賽後直指柏迪已經係「世界最佳中場之一」。

巴塞今場控制戰局，不過製造機會次數唔多，奧士文尼迪比利更喺上半場傷出，由柏迪代替上陣，亦係呢位小將第100次為巴塞喺正式賽事披甲。繼上輪聯賽一箭定江山贏基達菲後，柏迪今場61分鐘再趁基羅納門將撲波甩手，門前射入全場唯一入球。

Opta數據顯示，自從沙維出任巴塞教練後，柏迪11次命中目標攻門就入8球，入球轉化率高達72.7%，沙維賽後大讚：「柏迪已經係可以改變戰局嘅球員，睇埋佢入波同助攻數據，我哋講緊嘅係一個20歲球員，已經成為自己位置入面世界最佳球員之一。」