港超聯　逾3個月後再入波　陳曉鋒：攞3分更重要

「中銀人壽香港超級聯賽」周日（29日）尾場賽事，作客將軍澳運動場的和富大埔，以3比0擊敗香港U23，聯賽重回勝軌。今場除了巴西射手保連奴梅開二度之外，陳曉鋒亦相隔3個月後再取得「士哥」，幫助球隊在兔年首場聯賽贏波，他認為比起入球，能助球隊取勝更為關鍵。

大埔是役對香港U23後防狂轟濫炸，但一直要去到上半場補時階段，才打破僵局，能夠在完半場前取得領先優勢，陳曉鋒認為非常重要：「對手香港U23係發揮得好好，好慶幸我哋上半場尾段入到球，帶住領先返更衣室，之後所有嘢都唔同曬。」「肥頭」比賽尾段憑1次角球攻勢，斬獲今季聯賽第2球，亦是繼去年10月之後再有波入。

這位大埔隊長去年年尾一度受傷患困擾，踏入兔年首戰就取得入球，他認為是好意頭，但認為能幫助球隊聯賽重返勝軌更為重要：「之前傷咗兩三個月都斷唔到尾，上場自己都有啲感觸，真係太耐冇比賽，今日可以喺同級對手身上全取3分係好開心，我入波都係其次，球隊贏波先係最緊要。」「肥頭」希望今場勝仗能為球隊沖喜，力爭在聯賽下半程取得更好成績。