得7個月貨仔　加度素極速被炒

最強博彩盤路過關神器《串績王》：http://win.on.cc/football/　

西甲球會華倫西亞宣布同教練加度素解約，結束雙方短短7個月賓主關係，「蝙蝠兵團」自2014年被新加坡商人林榮福收購之後，9年之間已經換咗10位主帥，呢個三煞位絕對唔易坐。

加度素上年夏天成為華倫西亞教練，簽約2年，佢曾經豪言會令球隊有耳目一新感覺，並簽入烏拉圭射手卡雲尼。「蝙蝠兵團」季初的確表現唔錯，但好快無以為繼，近10場聯賽僅獲得1勝4和5負，排聯賽第14位，開始受到降班威脅。

因此，呢位45歲意大利少帥被炒，並唔令人意外，球隊暫時由禾路擔任臨時教練，亦係佢第8次做呢個位置，堪稱「替工之王」，皆因班主林榮福平均每年就換1位主帥，至於仲有邊位「勇士」願意接受挑戰，接手執教華倫西亞，仍然係未知之數。