阿仙奴閃執車仔賣剩蔗 廠迷唔Buy

2023年01月31日 18:49
東網電視
更多新聞短片
阿仙奴由於斟介白禮頓中場摩西斯卡些度未有進展,英國傳媒大爆佢哋嘅Plan B,竟然係車路士中場佐真奴,甚至已經達成協議準備簽約,不過「廠粉」對呢單交易唔多睇好。
鑑於艾利尼可能因傷提早收咧,令阿仙奴中場人手緊絀,所以希望喺冬窗增兵,雖然主帥阿迪達心儀白禮頓中場摩西斯卡些度,但兩次報價都畀「海鷗」拒絕,加上臨近冬窗關閉,惟有向Plan B埋手。根據英國傳媒報道,阿仙奴嘅Plan B,竟然死敵車仔中場佐真奴,有指雙方簽約1年半,轉會費約1200萬鎊,連轉會專家羅曼奴都話呢單交易已經傾掂數,呢位意大利國腳亦趕去阿仙奴訓練基地準備簽約,事前冇漏出半點風聲,真係快過打針。
不過部分「廠粉」唔太睇好呢單交易,一來佐真奴近兩季水準大跌,之前射失12碼令意大利無緣殺入上年世盃決賽周,類型上與摩西斯卡些度截然不同,而且阿仙奴喺2020-21年季從車仔簽入自由身嘅韋利安,嚟到冇料到之餘,年紀大兼高薪,幾經辛苦先清走佢,今次再簽入年逾30嘅車仔賣剩蔗佐真奴,「廠粉」驚佢成為韋利安翻版。