熱刺新兵勾義嫂？曾被傳「派帽」畀菲歷斯

最強博彩盤路過關神器《串績王》：http://win.on.cc/football/　

熱刺喺冬季轉會窗完結前，宣布收購士砵亭右閘柏度樸路，轉會係以先借用形式，再喺夏天強制性4,200萬鎊買斷。柏度樸路嘅加盟令倫敦出現「三角關係」，事關呢位23歲球星曾被質疑勾義嫂，偷食車路士新兵祖奧菲歷斯女友，月底呢場「倫敦打吡」更有睇頭。

熱刺領隊干地對右翼衞進行執位，先同馬特杜靴迪解約畀佢轉會馬德里體育會，又將小將迪積史賓斯外借法甲嘅雷恩，騰出空間簽入葡萄牙球星柏度樸路，預料佢會即刻成為熱刺正選右閘，巴西球員艾馬遜會做佢後備。

柏度樸路名氣唔大，但上年亦曾成為新聞人物，佢喺上年5月為士砵亭比賽後，被影到唔理身邊多位小球迷，直接走到場邊向一位美女獻吻，而女主角竟然係祖奧菲歷斯女友Magui Corceiro，之後再有影片流出，報稱係柏度樸路同Magui喺夜店激吻，不過兩人隨即否認「有路」，澄清佢哋只係非常親密嘅朋友。