天價交易過後　雷哥斯達怒斥安仔見利忘義

最強博彩盤路過關神器《串績王》：http://win.on.cc/football/　

車路士從賓菲加以1.21億歐元破英超紀錄天價，簽入阿根廷天才中場安素費南迪斯，雖然賓菲加交易中獲得巨額轉會費收入，但會長雷哥斯達仍然好唔高興，周五(3日)公開炮轟「安仔」見利忘義，仲話唔想再見到佢！

雷哥斯達表示：「我哋想佢留到今個夏天先至離隊，咁樣佢唔會有任何損失，但當車路士向佢招手，佢就用唔同方法同賓菲加對抗，包括罷賽、玩失蹤，甚至違規離隊返阿根廷過新年，根本冇尊重過我哋。」

講到呢度，雷哥斯達更加火滾：「雖然我哋失去一位出色球員，但我哋只需要尊重球會嘅球員，我以後都唔想再見到佢着上賓菲加球衣！」

雷哥斯達講道義，不過安仔就唔係咁諗，賓菲加只係佢登陸歐洲嘅一塊跳板，車路士向佢開出年薪1000萬歐元肥約，為期8年半，見到呢份合約，老竇姓乜都唔記得啦。