皇馬比利時孖寶齊受傷　勢缺席世冠盃

足球博彩神器，每日重心提供盡在《彩報》：http://win.on.cc/football/　

皇家馬德里傷兵問題持續，繼艾達米列達奧同賓施馬受傷後，比利時孖寶泰拔高圖爾斯及夏薩特齊齊加入十字軍名單，其中門將泰拔高圖爾斯將不會隨隊到摩洛哥角逐世冠盃，皇馬焗用副選門將盧連。

傳媒報道，泰拔高圖爾斯上仗西甲對馬略卡賽前受傷，前左腿外展肌感到不適，臨時退下火線，要由盧連把關，結果「銀河艦隊」輸0比1。為免傷勢加劇，呢位比利時門將唔會隨隊到摩洛哥，肯定錯過4強對艾阿里，不過如果皇馬入到決賽，到時就要視乎其康復進展，如果傷勢無大礙，有可能飛到當地比賽。

至於夏薩特受傷就唔係新鮮事，皇馬官方公布，今次係佢加盟以來第18次受傷，今次受傷症狀係「左膝髕腱炎」，又唔知要抖幾耐，不過都冇所謂，事關夏薩特早就唔係常規正選，對球隊影響唔大。

有傳媒統計，夏神加盟皇馬以來，先後出現腿筋、足踝、腓骨、新冠、肌肉等傷患，連同今次總共18次傷病，而佢喺皇馬4年共上陣73場，交出7入球11次助攻，入球同助攻總和，同受傷次數睇齊。