前英超球星艾素被困地震廢墟　生死未卜

最強博彩盤路過關神器《串績王》：http://win.on.cc/football/　

土耳其周一(6日)發生黎克特制7.8級地震，造成過萬人傷亡，土超球員亦難幸免於難，曾經效力車路士、紐卡素等多間英超球會嘅基斯甸艾素，據報被困喺廢墟當中，目前消息眾說紛紜，球會總監兼土耳其名將迪米雷，更喊住拍片懇求外界支援。

31歲嘅基斯甸艾素效力土超球會哈塔斯堡，上場聯賽97分鐘絕殺幫球隊贏1比0後，隨即遇上大地震，佢同球會體育總監沙禾特都失蹤，據報2人正被困喺倒塌嘅建築物下面，土耳其方面正全力搜救。目前消息眾說紛紜，英國《衞報》曾指基斯甸艾素已被救出，並送去醫院接受治療，但哈塔斯堡消息就否認，表示：「好不幸，搜救行動仍然進行中。」

紐卡素、車路士等基斯甸艾素前球會，都喺社交網發文祈禱救援成功，哈塔斯堡技術總監迪米雷更喺IG開直播呼籲：「救救我哋！請帶晒你哋嘅資源嚟幫我哋......唔該你、唔該你，呢度嘅人已奄奄一息......」另外，土耳其乙組一名門將杜斯蘭亦失蹤，生死未卜。