達洛治將續約曼聯　人工3級跳

足球博彩神器，每日重心提供盡在《彩報》：http://win.on.cc/football/　

曼聯今季表現令人眼前一亮，唔少昔日嘅邊緣球員喺坦哈格領導下都脫胎換骨，右閘達洛治就係其中之一。呢位葡萄牙國腳同曼聯合約只剩1年半，據報喺坦哈格要求下已經接近達成協議，人工更加「3級跳」，確定佢曼聯主力嘅地位。

23歲嘅達洛治5年前已經加盟曼聯，但要到今季先真正上位，球會早前已宣布啟動佢合約內續約1年條款(到2024年)，不過坦哈格就講明要佢長期留隊，西班牙《世界體育報》報道，達洛治已經同曼聯傾掂續約，巴塞隆拿挖角計劃正式終止。

英國《太陽報》消息指，達洛治依家周薪係3萬鎊，但新約會大幅提升至8.5萬鎊，而且仲會另加獎金條款。自世界盃後一直受傷患困擾嘅達洛治，近日已經重投操練，有望復出搶番雲比沙卡嘅正選右閘位置。