亞洲球隊威水!希拉爾打入世冠盃決賽

2023年02月08日 08:03
東網電視
更多新聞短片
(Getty Images)
最強博彩盤路過關神器《串績王》:http://win.on.cc/football/ 
周三(8日)凌晨世冠盃4強爆出大冷門,沙特阿拉伯勁旅希拉爾以3比2擊敗南美自由盃得主法林明高,首次打入決賽。希拉爾前鋒艾達沙尼繼今屆世界盃射死阿根廷之後,今仗再次扮演巨人殺手,個人梅開二度,堪稱亞洲球壇奇迹之男。
今屆賽事喺非洲阿拉伯國家摩洛哥舉行,沙特猶如佔有半個主場之利,踢法非常進取,開波2分鐘就搏到12碼,韋圖殺入禁區被法林明高後衞馬菲仙奴撞跌,球證吹罰12碼,艾達沙尼主射入網為希拉爾打開紀錄。
戰至20分鐘,馬菲仙奴將功補過,妙傳畀柏度古靴美射入扳平1比1。不過,去到上半場補時,法林明高又有球員犯天條,中場謝臣山度士喺禁區內踩跌韋圖,球證睇完VAR後,唔止吹罰12碼,仲向謝臣山度士示出黃牌,令佢兩黃變一紅被逐。艾達沙尼再次操刀射入12碼,協助希拉爾領先2比1入更衣室。
換邊之後,希拉爾人多打人少,優勢更加明顯,70分鐘韋圖喺禁區右路勁射入網,將紀錄拉開至3比1。雖然法林明高喺補時由柏度古靴美近門補射入網追至2比3,但為時已晚,呢支巴西老牌球隊黯然出局。
希拉爾成為繼鹿島鹿角、艾阿恩之後,第3支打入世冠盃決賽嘅亞洲球隊,將會同艾阿里對皇家馬德里嘅勝方爭冠軍。
沙特阿拉伯球壇過去3個月創出3大奇迹,首先喺世界盃分組賽爆冷擊敗阿根廷,亦係呢支南美勁旅捧盃過程中唯一敗仗。其後沙特富豪球會艾納斯簽入葡萄牙巨星C朗,亦震驚球壇,加上希拉爾今次打入世冠盃決賽,沙特足球可以話係上演「奇迹帽子戲法」。