美斯拒絕減薪　今夏或離開PSG

最強博彩盤路過關神器《串績王》：http://win.on.cc/football/　

西班牙傳媒爆料，指美斯拒絕巴黎聖日耳門(PSG)提出嘅減薪續約要求，由於呢位35歲阿根廷球王將於今夏約滿，意味一旦傾唔掂數，就會走人，屆時勢必引來各大豪門爭奪。

上年世界盃舉行之前，盛傳美斯同意同PSG續約1年，但後來情事有變，由於呢間法甲富豪球會受到公平財政條例限制，需要球員整體減薪30%，會方希望美斯同球會一齊共度時艱，但呢位射手拒絕，令續約談判陷入僵局。

事實上，美斯即使年紀唔細，但仍然保持高水平狀態，今季為PSG上陣28次入17球及16次助攻，上年12月協助阿根廷捧世界盃冠軍，加上早前當選世界足球先生，的確冇理由接受減人工。

據悉已經有唔少球會對美斯虎視眈眈，包括佢嘅母會巴塞隆拿、美職球隊國際邁亞密。不過巴塞財政欠佳，恐怕無力負擔美斯人工，佢無意離開歐洲球壇，去美職搵食機會唔大。

撇開PSG，有能力簽到美斯嘅歐洲豪門，可能得車路士、曼城、拜仁慕尼黑。