熱刺策劃「兵變」　睇中馬天尼斯

足球博彩神器，每日重心提供盡在《彩報》：http://win.on.cc/football/　

英超勁旅熱刺今夏準備換血，門將位置係重點區域，效力11年嘅老將洛里斯盛傳將會退位讓賢，據報熱刺已展開搜尋接班人計劃，目標直指阿士東維拉嘅達米安馬天尼斯。呢位阿根廷國腳曾效力死敵阿仙奴10年，如果「兵變」加盟熱刺，將會再成話題人物。

熱刺門將洛里斯已經36歲，後備門將費沙科士打亦34歲，《Football London》報道熱刺正物色新龍門，名單包括邁治蘭、比克福特、羅拔山齊士同大衛拉耶等等，不過喺上年世盃獲選為「金手套」嘅達米安馬天尼斯就係主要目標，佢幫阿根廷贏世界盃後，已表示希望能夠加盟踢歐聯嘅球隊，今夏轉會機會頗高。

30歲嘅達米安馬天尼斯把關技術一流，不過場外行為就受到唔少質疑，世盃決賽後多番嘲諷基利安麥巴比嘅行為就相當肉酸，曾經效力阿仙奴10年嘅佢，如果「兵變」為熱刺效力，將會引起更多爭議。據報維拉就算答應賣走達米安馬天尼斯，叫價亦會高達5,000萬鎊。