根度簡榮升爸爸　國際賽免役專心湊仔

足球博彩神器，每日重心提供盡在《彩報》：http://win.on.cc/football/　

曼城中場根度簡近日榮升做爸爸，呢位德國國腳周四(16日)宣布，老婆Sara誕下兩人首個愛情結晶Kais。據報初為人父嘅根度簡將會缺席德國月底對秘魯同比利時嘅兩場熱身賽，專心做「湊仔公」。

曼城周中歐聯大勝RB萊比錫7比0，根度簡都有份入波，賽後佢更初嘗人父滋味，老婆Sara喺社交網貼上根度簡抱住BB嘅相片，相當溫馨。德國《天空體育》報道，德國領隊費歷克新一輪國家隊名單唔會挑選根度簡，但主要原因係畀佢安心照顧家人，並唔係因為世界盃決賽周嘅差勁表現而受懲罰，根度簡仍然喺費歷克未來計劃之中。

根度簡同曼城嘅合約去到季尾完結，目前仍未有續約消息，傳早巴塞隆拿有意向佢提出聘約，不過根度簡目前最大目標，係幫曼城爭奪英超、歐聯同英足盃「3冠王」。