C朗連續20年入選國家隊　將挑戰一項神紀錄

最強博彩盤路過關神器《串績王》：http://win.on.cc/football/　

葡萄牙國家隊新帥馬天尼斯公布上任後首份大軍名單，已經去咗沙特阿拉伯搵食嘅38歲老將C朗仍然榜上有名，呢位前鋒連續20年入選國家隊，並且只要再上陣1場，就可以超越科威特名將艾梅達華，成為史上最多次男子國家隊上陣球員。

C朗近年水準下滑，上年世界盃表現備受批評，但葡萄牙新帥馬天尼斯仍然器重呢位球星，佢話：「C朗可以為球隊提供經驗，佢喺隊內有好大威望，我揀人從來唔睇年齡，佢同其他球員都一樣有入選機會，我希望葡萄牙年輕球員可以從C朗身上學嘢。」

C朗自2003年首次入選葡萄牙國家隊以來，保持每年都有入選，至今已為球隊上陣196次，同科威特名將艾梅達華並列史上男子國家隊最多披甲球員紀錄。

葡萄牙將於3月24日凌晨歐國盃外圍賽J組主場對列支敦士登，3日之後作客盧森堡，如無意外C朗都會上陣，刷新紀錄。