夏蘭特同意廢除解約條款　但有一個條件

足球博彩神器，每日重心提供盡在《彩報》：http://win.on.cc/football/　

艾寧夏蘭特上年夏天由多蒙特加盟曼城，簽約5年，合約包含解約條款，等到2024年，其他球會只要出2億歐元就可以買斷呢位22歲挪威國腳。最新消息指，夏蘭特同意廢除解約條款，但條件係領隊哥迪奧拿必須留隊。

艾寧夏蘭特嘅解約條款原本將於2024年生效，兩大勁旅巴黎聖日耳門、皇馬都有意屆時出手收購佢，但依家夏蘭特同意廢除條款，意味其他球會如果想喺2027年夏天約滿前簽入夏蘭特，就必須得到曼城同意，否則出幾多轉會費都係徒然。

不過，夏蘭特並非無條件同意廢除解約條款，如果哥迪奧拿今年離開曼城，佢嘅解約條款仍然會喺2024年生效，兩位將帥命運可以話係綁埋一齊。

另外，曼城宣布同前鋒祖利安艾華利斯續約至2028年6月，呢位23歲阿根廷國腳嘅周薪將增加至10萬鎊，佢今季為曼城上陣33次，射入10球及3次助攻。