大專足球　城大女足3球挫理大　成功衞冕

「2022-23年度大專盃足球決賽」周六（18日）於旺角大球場舉行，頭場女子組冠軍戰上演去屆「翻版戲碼」，由香港城市大學面對香港理工大學。城大憑曾浩恩、李穎欣及黃子盈各建一功，最終以3球取勝，順利衞冕。

「大專盃」女子組決賽首次在旺角場舉行，並自疫情後重新開放予球迷入場，氣氛相當不俗。兩隊今場同樣強陣出擊，城大派出曾麗薇在中場掃蕩，李穎欣及曾浩恩在前線攻堅。至於理大剛入選2024巴黎奧運亞洲區外圍賽決選名單的5名港腳悉數擔正，許以心及郭藹嵐鎮守後防，陳綺馨、傅昭文及曾柏同齊齊坐鎮中場。

力爭衞冕的城大1分鐘已先開記錄，張紫晴右路落底傳中，門前一輪混戰，最後曾浩恩大腳抽入。落後的理大隨後急起直追，5分鐘曾柏同射門僅僅斜出，9分鐘後傅昭文遠射又被門將Patricia Ninson接實 。18分鐘城大再下一成，李穎欣接應曾浩恩直線，輕鬆射入，城大領先2比0。上半場尾段理大再有一次黃金機會，但王采晴勁射被門將Patricia Ninson撲到再中楣，半場理大落後兩球。

下半場初段城大繼續佔優，李穎欣罰球直射，但未能考驗對方門將朱幸怡。60分鐘城大再出現單刀機會，黃子盈射門中楣彈入，擴大領先優勢至3球，比賽尾段兩隊各自換入後備，最終城大維持勝局，以3比0輕取理大，連續兩年在決賽擊敗對手，成功衞冕。

今年畢業的曾浩恩（Letti）在決賽交出1入球、1助攻，帶領城大成功衞冕「大專盃」冠軍，賽後她承認結局確實圓滿：「本身希望今年大專每一場都入波，咁都做到嘅。雖然今場位置係咁調動，好似上半場踢過前鋒同翼，下半場又踢閘，但為咗球隊好，我都無問題，希望城大下年繼續搞到女子隊。」Letti目前效力甲組傑志，對於未來會否希望成為大港腳，她則表示一切「隨緣」：「之前因為想專注踢好校隊、球會，同埋學業方面，所以year 1個陣已經無踢港隊U23；其實我係無入選過一隊嘅，依啲嘢將來再算，有機會嘅話都會想試吓，但目前唔係我最專注嘅嘢。」

理大再次不敵城大，賽後後衞郭藹嵐認為球隊整場製造了不少攻勢，但門前把握力成勝負分野：「攻勢可能多過對手，但可能大家因為心情比較緊張，明顯不在狀態，所以把握唔到，但足球就係咁，邊隊入波就邊隊贏。上半場完之後係醒咗，但始終太遲。」