寸得太早！夏維斯鬼臉慶祝惹樸達不滿

最強博彩盤路過關神器《串績王》：http://win.on.cc/football/　

近期狀態回勇嘅車路士，周日(19日)凌晨英超主場兩度領先上，被愛華頓臨完場前入波逼和2比2。車路士再之失分，德國前鋒夏維斯就成話題人物，佢今場入波後寸爆向愛華頓門將比克福特「扮鬼臉」慶祝，最終贏唔到波而被網民恥笑，連領隊樸達都鬧佢唔應該咁做。

車路士今場控制大局，52分鐘由祖奧菲歷斯射成1比0，不過佢哋防守麻麻，69分鐘防守角球走甩杜哥利被追平。車路士76分鐘由列斯占士博到12碼，夏維斯操刀射入再度領先，呢位德國國腳入波後忽然招積，對住愛華頓門將比克福特伸脷扮鬼臉，懷疑係報復對方射12碼前嘅騷擾戰術。但係愛華頓喺完場前1分鐘由22歲小將森斯追和2比2，令車路士未能笑到最後。

車路士失分後繼續排喺聯賽榜第10位，夏維斯嘅鬼臉慶祝就成為笑柄，連領隊樸達都睇唔過眼話：「當球員入波之後，佢哋會有啲情緒想釋放，我自己唔係入過好多波，所以唔係好清楚，球員應該享受慶祝入波，但唔應該將對手拉埋入嚟。」