今次唔一樣啦　曼聯將提早同坦哈格續約

最強博彩盤路過關神器《串績王》：http://win.on.cc/football/　

曼聯今季由坦哈格執教之後，表現脫胎換骨，已經率先奪得英聯盃冠軍，甚至有望衝擊「三冠王」目標，英國各大傳媒指紅魔鬼管理層決定提早同呢位53歲荷蘭名帥續約，無論球會將來新老闆係邊個，都唔會動搖到坦哈格帥位。

坦哈格上年夏天由阿積士轉投曼聯，簽約3年，薪酬總值2,700萬鎊，會方有權優先同佢延長1年合約，管理層見到球隊成績出色，已經急不及待準備啟動條約，同坦哈格續約1年，以穩定軍心，令佢相信自己帥位唔會受到曼聯賣盤問題影響。

曼聯熱門買家英國首富拉特克利夫上周五(17日)率領團隊抵達紅魔鬼總部，傾收購事宜，都有同坦哈格見面。根據英國《鏡報》爆料，無論拉特克利夫或者另一個主要買家卡塔爾財團，都對坦哈格嘅教波成績作出肯定，相信球會易主之後，佢前途一片光明。