同人唔同命！網民：般費有推球證特權？

最強博彩盤路過關神器《串績王》：http://win.on.cc/football/　

富咸喺英足盃8強被曼聯淘汰，將帥合共炮製3張紅牌可以話係咎由自取，其中阿歷山大米祖域出手推球證更加不智，前英超球證希斯表示英足總應該重罰呢位前鋒停賽10場。不過有網民表示，曼聯中場般奴費南迪斯早前亦推旁證，結果球證當冇事，英足總亦拒絕追究，唔少球迷都炮轟判決係「雙重標準」。

阿歷山大米祖域今場投訴期間，用手肘推球證後被趕出場，但相同畫面喺月初曼聯作客利物浦亦有出現，當時般奴費南迪斯從後一掌推開旁證，不過事件就「冇下文」，賽後英國球證協會主席呼籲英格蘭足總應該追罰般費停賽5場，但足總就拒絕受理。

大批網民賽後都批評球證執法尺度完全唔一致，有球迷表示：「連推球證都有特權？」除網民之外，《talkSPORT》嘅前英格蘭國腳戴倫賓特都話：「般奴費南迪斯推旁證乜事都冇，阿歷山大米祖域就即場紅牌，VAR嘅尺度不一真係好令人尷尬。」