沙卡入球助攻「雙雙」　阿仙奴帶出8分

最強博彩盤路過關神器《串績王》：http://win.on.cc/football/　

周日(19日)英超賽事，榜首阿仙奴主場4比1大勝水晶宮，喺聯賽拋離踢少1場嘅曼城8分，形勢大好。阿仙奴近期火力全開，布卡約沙卡今場交出2入波同1助攻後，成為今季英超首個入球+助攻都達雙位數字嘅球員。

阿仙奴喺歐霸盃16強出局，返到英超即全力開火，28分鐘加比爾馬天尼利接應布卡約沙卡傳中射入，43分鐘布卡約沙卡突破越位射成2比0。阿仙奴下半場繼續圍攻，格列沙加55分鐘再入1球，就算水晶宮之後藉角球破蛋，但布卡約沙卡74分鐘埋齋，帶領阿仙奴大勝4比1。

布卡約沙卡今季英超累積12個入波同10次助攻，係今季英超首個「雙雙」球員，亦係自16/17球季嘅阿歷斯山齊士後，阿仙奴首個交出「雙雙」數據球員。布卡約沙卡賽後表示：「幫到球隊我就開心，無論係入波或者助攻，今場我做得到並且贏波，所以我好開心。」