干地飛返意大利　熱刺球員要求利維「郁手」

足球博彩神器，每日重心提供盡在《彩報》：http://win.on.cc/football/　

熱刺上場聯賽被修咸頓逼和3比3後，領隊干地喺賽後記者會大爆發，毫不留情狂插球員自私自利，批死熱刺唔改變永遠冇盃捧。據報熱刺主席利維召開危機會議後，干地已經飛返意大利，而部份球員就對干地非常不滿，要求利雲喺今個國際賽期內將干地炒魷。

英國《太陽報》同《每日郵報》報道，熱刺喺周日(19日)召開危機會議，干地解釋佢嘅炮轟矛頭係指向球員，並非攻擊球隊管理層，而主席利維仍未決定下一步行動，不過干地喺會議後已經如常飛返意大利陪家人，仲使唔使飛返英國仍係未知數。

消息指熱刺部份球員已經頂唔順干地，要求利維喺國際賽期間換帥，尤其干地同熱刺嘅合約季尾完結後，幾乎肯定唔會續約，而且經過干地今次炮轟後，將帥之間已經完全失去信任關係，今季餘下賽事好難再繼續合作。