米祖域面臨全季停賽　富咸用「般費事件」抗辯

足球博彩神器，每日重心提供盡在《彩報》：http://win.on.cc/football/　

富咸喺英足盃8強對曼聯一仗，阿歷山大米祖域、韋利安同領隊馬高施華3人齊齊被逐，英格蘭足總發出聲明，表明推球證嘅阿歷山大米祖域將面臨長期停賽，有機會今季內都唔能夠再上陣。據報富咸嘅書面抗辯，將引入般奴費南迪斯早前推旁證未受處分一事作例子，希望足總對阿歷山大米祖域從輕發落。

英格蘭足總聲明表示：「關於阿歷山大米祖域對球證施用嘅暴力行為，足總認為標準嘅處分明顯唔足夠。」意味呢位塞爾維亞前鋒面臨嘅停賽，肯定比一般紅牌停賽3場更加嚴厲，英超名將瑟頓同前球證希斯均估計停賽最少10場，而富咸今季只剩11輪聯賽，阿歷山大米祖域有可能「提早收咧」。

據英國《每日郵報》報道，富咸可以喺聆訊過程中提出書面抗辯，消息指佢哋將會引用月初般奴費南迪斯推旁證一事作例子，當時球證甚至冇將事件寫入球證報告，英足總亦冇作出追究，質疑英足總對有關事件判罰嘅唔一致。意大利球星迪肯尼奧喺1998年曾經將球證推跌，結果被判停賽11場。