迪甘斯投信任票　麥巴比成法國新隊長

足球博彩神器，每日重心提供盡在《彩報》：http://win.on.cc/football/　

法國上年底喺世盃決賽飲恨後，洛里斯、華拉尼、賓施馬等老將宣布退役，洛里斯嘅隊長職務亦要另覓人選。據法國《隊報》消息，領隊迪甘斯已決定委任基利安麥巴比做新隊長，預料雙方商討後會喺周四(23日)正式公布。

法國大軍周一(20日)集合，準備歐國外對荷蘭同愛爾蘭，領隊迪甘斯首個問題係邊個接替洛里斯嘅隊長職務，消息指基利安麥巴比同基沙文都係熱門人選，不過迪甘斯最終決定將重任交畀24歲嘅基利安麥巴比，令佢同挪威嘅馬田奧迪加特一樣，成為歐洲少數嘅年輕隊長。

《隊報》指迪甘斯將會同基利安麥巴比會面商討，預計該巴黎聖日耳門球星會好樂意接受呢個任務。基利安麥巴比喺國家隊影響力大，上年就曾經就肖像權問題，代表國腳同法國足總談判，並曾發動杯葛國家隊商業活動。