忍無可忍！前祖記球員場邊屙尿被逐

足球博彩神器，每日重心提供盡在《彩報》：http://win.on.cc/football/　

周日(19日)意丙聯賽出現罕見一幕，曾經效力過祖雲達斯嘅前鋒布連奴，喺後備上陣前靜靜雞喺場邊「放水」，點知被球證見到，未有機會入替就食紅牌出場，布連奴嘅教練賽後就批評球證做法「無情」。

歷高周日作客皮亞琴察，1月外借加盟嘅布連奴喺73分鐘獲派上陣，咁啱佢當時人有三急，就趁入替前空檔走去場邊匿埋小便，點知呢個行為被眼利嘅球證發現，結果被即時出示紅牌。呢場聯賽最後踢成0比0完場。

歷高教練科斯治賽後表示：「球證係跟規例做嘢，但我覺得都要加入一啲常識，布連奴冇傷害任何人，甚至冇其他人睇到佢小便，我覺得黃牌已經足夠。」26歲嘅布連奴曾經效力祖雲達斯，但3年間只係試過為U23上陣，亦曾2次代表意大利U19國家隊，估唔到今次因為呢個原因成為球壇焦點。