阿仙奴爭標打擊　富安健洋提早收咧

足球博彩神器，每日重心提供盡在《彩報》：http://win.on.cc/football/　

阿仙奴喺英超爭霸受到打擊，早前喺歐霸盃16強受傷嘅日本國腳富安健洋，據報將會進行膝部韌帶手術，預計要休息3個月時間，今季提早收咧。

24歲嘅富安健洋受傷後，已經退出日本今輪國際賽大軍，近日亦被影到要拎枴杖行路，據報佢經檢查後發現膝部嚴重受傷，要做手術治療，預計6月尾先可以復出，希望趕得切參加下季季前集訓。

阿仙奴右閘位置今季由賓韋特佔據，不過可以兼任左閘同中堅嘅富安健洋都有唔少上陣機會，今季各項賽事合共31次上陣。富安健洋缺陣期間，阿仙奴可能要用湯馬士柏迪幫手客串右閘。