曼聯考察三笘薰　阿仙奴又再神助攻

足球博彩神器，每日重心提供盡在《彩報》：http://win.on.cc/football/　

白禮頓日本前鋒三笘薰今季表現神勇，身價暴升，近日盛傳曼聯已派出球探考察，另外阿仙奴亦對呢位扭波王感興趣，今夏可能又再出現曼聯同阿仙奴爭球員情況，但睇「往績」阿仙奴都係簽唔到，而係「神助攻」畀曼聯居多。

三笘薰前季加盟白禮頓嘅轉會費只須260萬鎊，周薪僅2萬鎊，佢今季喺英超大爆發，上陣27場交出9球6助攻，市場估計佢身價暴升至少10倍，英媒報道，曼聯於數星期前派出球探考察其表現。

曼聯今季仲有兩次對白禮頓機會，其中一場係英足盃4強，到時曼聯可以正面感受呢位扭波王嘅實戰能力，白禮頓會長布隆亦知道三笘薰嘅吸引力，佢話：「佢今夏將會成為轉會市場焦點，我哋已經做好準備。」

轉會專家Fabrizio Romano透露，除咗曼聯，阿仙奴都想簽三笘薰，但有球迷認為阿仙奴嘅角色只係助攻，事關佢哋去年夏天同曼聯爭利辛度馬天尼斯輸咗，冬窗想簽梅迪歷又畀車路士截胡，睇嚟阿仙奴今次都係得個睇字。