干地等收400萬鎊解約金　球員群起「補刀」

最強博彩盤路過關神器《串績王》：http://win.on.cc/football/　

熱刺領隊干地早前公開炮轟球員，據報球會主席利維已決定將佢炒魷，依家正商討解約金細節，估計只剩3個月合約嘅干地將獲賠400萬鎊。至於受到批評嘅熱刺球員亦不甘示弱，賀積查治同基斯甸羅美路都開聲反擊，相信佢哋都好樂意見干地離隊。

熱刺一眾國腳近日都返去所屬國家隊報到，丹麥國腳賀積查治被記者問題干地事件，呢位中場「有骨」回應：「我哋都睇到個記者會，干地好唔滿意球隊成績，好不幸球隊成績差係事實。不過我認為干地應該詳細講解佢不滿咩地方，我哋做球員先至知道點樣改善，批評要精準啲，球員先會上心！」

至於阿根廷中堅基斯甸羅美路，雖然冇正面回應干地事件，但佢就喺社交網貼出阿根廷訓練相片，留言表示：「好開心返到阿根廷國家隊，一個我真正享受嘅地方。」暗示佢喺熱刺踢得並唔太開心。