曼聯賣盤變鬧劇　截標時間又延期

最強博彩盤路過關神器《串績王》：http://win.on.cc/football/　

格拉沙家族出售曼聯一事，不斷出現變數，原定英國時間周三(22日)晚上9時截標，但兩大熱門買家卡塔爾財團、英國首富拉特克利夫都未有提出最新報價，結果負責今次賣盤事務嘅美國銀行Raine Group應要求將截止時間延期48小時。

據悉卡塔爾財團、英國首富拉特克利夫曾經提出以接近50億鎊收購曼聯，但紅魔鬼班主格拉沙家族仍然唔滿意，會方表示喺截標之前，仍未收到兩大買家最新報價，經過溝通之後，決定將截止時間延期48小時，畀佢哋有時間重新出價。

盛傳總共有8個財團出價收購曼聯，當中以卡塔爾財團、英國首富拉特克利夫最大機會入主紅魔鬼，格拉沙家族要求60億鎊收購價，同呢兩大買家出價有10億鎊距離，至於最終邊個會讓步，甚至賣盤失敗，大家拭目以待。