C朗未玩完！起孖率葡萄牙大勝創紀錄

足球博彩神器，每日重心提供盡在《彩報》：http://win.on.cc/football/　

葡萄牙上年世盃8強出局，淪為後備嘅C朗拿度賽後痛哭離場，唔少球迷都認為呢位38歲傳奇嘅「葡萄牙時代」已經結束。不過周五(24日)凌晨歐國外J組，新帥馬天尼斯繼續派C朗擔正，佢亦不負所託梅開二度，帶領葡萄牙主場4比0大勝列支敦士登，同時以197頂喼帽成為史上男子國家隊最多上陣球員。

葡萄牙主場強陣出擊，由於雙方實力差距太大，葡軍全場錄得34次攻門，不過上半場只靠祖奧簡斯路入波領先1比0，換邊後2分鐘貝拿度施華射入拉開紀錄。51分鐘祖奧簡斯路博到12碼，C朗操刀射成3比0，佢喺63分鐘再憑招牌罰球建功，個人梅開二度，協助葡萄牙大勝4比0。

今場係C朗第197次為葡萄牙國家隊上陣，打破科威特名將艾梅達華嘅史上男子國家隊最多披甲紀錄(196次)。葡萄牙領隊馬天尼斯賽後表示：「葡萄牙開始一個新嘅循環，球員一定要全情投入，C朗嘅經驗非常重要，佢亦喺今場證明自己嘅價值。」