「比利上身」都冇用　巴西首次輸畀摩洛哥

最強博彩盤路過關神器《串績王》：http://win.on.cc/football/　

周日(26日)早上國際熱身賽，巴西球員着上印有比利大名嘅球衣，作客鬥摩洛哥，紀念呢位上年12月底逝世嘅球王。不過，巴西唔多爭氣，以1比2敗陣，亦係「森巴兵團」史上首次不敵摩洛哥。

巴西上年世界盃8強止步，領隊迪迪離任後，仍然未聘請新主帥，今仗由巴西U20領隊羅曼文尼斯暫時領軍，並委任卡斯米路做隊長，接替堤亞高施華。

巴西喺26分鐘曾經由雲尼斯奧斯祖利亞射門入網，但經VAR檢視後，指呢位皇馬翼鋒越位在先，被判入球無效。巴西入波唔成，3分鐘後就失守，被摩洛哥前鋒保法爾射破大門。

換邊後，巴西由新隊長卡斯米路勁射入網扳平1比1，但佢哋開心咗冇幾耐，就再次落後，沙比利為摩洛哥射成2比1，呢支非洲球隊延續打入上年世界盃4強嘅童話故事，今仗又爆冷首次擊敗巴西，認真神奇。