許龍一奪冠　成首位香港亞巡賽冠軍兼奪大滿貫資格

「國際都會高爾夫球錦標賽」周日（26日）舉行最後1日賽事，最終許龍一力保領先優勢，勇奪冠軍，成為第1位奪得亞巡賽冠軍的香港球手，並取得今季英國公開賽入場券，將自1959年後首位參加高球大滿貫的香港人。

由於日前受天氣惡劣影響，賽會決定賽事由4輪72洞，減至3輪54洞。一直在榜首領先的許龍一周日完成餘下賽事，雖然這位香港球手在第3輪打出4次柏忌，但他於中後段成功捕捉3次小鳥，使其繼續在榜首領先，之後許龍一維持穩定演出，最後分別以2及3桿優勢，力壓新西蘭及澳洲選手奪冠，以總成績低標12桿的198桿，成為首個贏得亞巡賽冠軍的香港球手，創下歷史。

許龍一今年展開職業生涯，隨即勇奪冠軍兼獲得英國公開賽參賽入場券（賽事前四名皆獲入資格），他對能夠在生涯剛起步便取得這些成就，感到難以置信，並向支持自己的球迷致謝，表示賽後最想做的事就是好好休息：「今朝5點半到依家都冇食過嘢，同埋對鞋已經濕哂，所以好想休息吓，好好同屋企人渡過今日。」此外，「龍一」坦言受天雨影響，令他在第3輪面對極大困難，慶幸能跨過難關：「天氣係冇辦法控制嘅因素，相信賽會已經做咗最周全嘅安排，我唯一可以做嘅，就係努力交出好表現，好彩最後都克服到呢個難關。」

「龍一」的父親就讚賞兒子心理質素穩定，成為致勝關鍵：「雖然佢今日頭幾個洞都打得唔算理想，但都好冷靜，冇變到好心急，呢樣嘢係佢贏冠軍嘅關鍵。」談到「龍一」成為職業球手，已經取得理想成績，他有信心其子不會為此受到壓力：「我同佢講，呢個絕對唔會係最後1個冠軍，相信呢個冠軍代表佢又衝破1個樽頸位，更加有動力應付比賽。」許龍一將會7月參加英國公開賽，9月將代表香港出戰杭州亞運會。

成績表：（只列前4）

排名 球員(國家/地區) R1 R2 R3 總桿數

1 許龍一(香港) 64 64 70 198

2 亨特利(新西蘭) 68 64 68 200

3 史密夫(澳洲) 69 66 66 201

4 金畢歐(南韓) 68 69 65 202

4 塔布埃納(菲律賓) 63 67 72 202