隊友唔生性玩嘢　隨時連累美斯冇得續約

最強博彩盤路過關神器《串績王》：http://win.on.cc/football/　

阿根廷早前喺熱身賽以2比0擊敗巴拿馬後，球隊舉行捧世界盃慶祝活動，球員一人一盃，紛紛舉起仿造嘅世界盃，同球迷分享喜悅。不過，有幾位國腳重演門將達米安馬天尼斯喺世界盃決賽頒獎禮「不文動作」，再次引起輿論批評及法國球迷不滿，甚至可能影響美斯同法甲豪門巴黎聖日耳門(PSG)嘅續約工作。

達米安馬天尼斯喺世界盃決賽接過代表最佳門將嘅金手套獎後，將獎座放胯前，作出疑似自瀆姿勢，佢話係要反擊現場鬧佢嘅法國球迷，事件引起軒然大波。

達米安馬天尼斯仲未吸取教訓，今次更加同古度洛迪古斯、魯利等隊友，拎住世界盃仿製品，一齊做出呢個不文動作，立即被傳媒廣泛報道，普遍輿論批評佢哋低俗、冇品、故意挑釁。

事件再次激起法國球迷不滿，甚至唔少人遷怒埋美斯，分析指PSG為免引起公憤，隨時放棄同呢位35歲球王續約。事實上，雙方就續約問題一直傾唔掂數，加上阿根廷球員今次又玩嘢，令達成續約協議嘅機會更加低。